ஆண் மனம்

மீனின் கண்ணீர்
நீருக்குத்தெரியும்
ஆணின் கண்ணீர்
யாருக்குத்தெரியும்
அழுவதற்கும் வழியில்லா
அவல நிலை
இந்த ஆண்களுக்கு
தேக்கி வைத்த சோகம்
நெஞ்சில் சுமையாகும் பொழுது
அவன் அழுவதற்கு
ஆறுதலாய் அமைந்த இடம்
குளியலறை
குளியலறையில்
வழிந்தோடும் நீரில்
கரைந்தோடும் அவன் கண்ணீர்
ஆம்....
பாடல்கள் மட்டுமல்ல
சில நேரம்
ஆண்களின் அழுகையும்
குளியலறையில் அரங்கேறுகிறது.

ராணுவ வீரனின் கவலை

சீறிவரும் எதிரியின்
தோட்டாக்களை கண்டு
சிறிதும் பதறியதில்லை

எடுத்து வைக்கும்

அடுத்த அடியின் கீழ்

கண்ணிவெடி இருக்குமோ

என்றும் பதறியதில்லை

ஆனால்....

மருத்துவமனை சென்ற

வயதான என் தாய்

மருந்து வாங்கும் இடம் தேடி

அலைவாளே என்றும்

அண்டை நாட்டு எதிரியை

துச்சமென நினைக்கும்

வீரனின் தங்கை

கல்லூரி செல்லும் வழியில்

கயவர் சீண்ட

நடுங்குவாளே என்றும்

நினைக்கையில் நெஞ்சம்

பதறுகிறது.

முதியோர் இல்லம்

வயதான பெற்றோரை

முதியோர் இல்லம் சேர்க்க

வழியில் ஒருவரிடம்

விலாசம் விசாரித்தேன்

வலது புறம் திரும்பியதும்

பழைய பேப்பர் கடை வரும்

அதற்கு அருகில் என்றார்...

திரும்பி வந்து விட்டேன் .

நம்பிக்கை ஒலி

பார்வையற்ற பிச்சைக்காரர்

தட்டில்

சில்லறை சத்தம்.

நாய்ப்பாசம்

குப்பைத்தொட்டியில் குழந்தை

ஆச்சரியத்தோடு பார்த்தது

நாய், தன் குட்டியுடன்.